Skógrækt í Selfjalli
Árið 2009 var gerður samningur milli Kópavogsbæjar, Skógræktarfélags Kópavogs og Skógræktarfélags Íslands um skógrækt og uppgræðslu í Selfjalli í Lækjarbotnum. Alls er svæðið um 143 ha. Gert er ráð fyrir að framkvæmdin standi yfir til ársins 2020 og að árlega verði gróðursettar liðlega 12.000 trjáplöntur á svæðinu og uppgræðsla nái til um 6 ha lands á ári hverju.
Unnið hefur verið í Landgræðsluskógaverkefninu í Kópavogi frá árinu 1990, í samvinnu Skógræktarfélags Kópavogs og Kópavogsbæjar. Með tilkomu nýs beitarhólfs á Mosfellsheiði, sem fjölmörg sveitarfélög í landnámi Ingólfs standa að, urðu til ný sóknarfæri í uppgræðslu utan hinnar svokölluðu höfuðborgargirðingar og var þá farið að huga að nýjum svæðum til skógræktar og uppgræðslu á þessu svæði. Hafist var handa við verkefnið í Selfjalli sumarið 2009 og var það Vinnuskóli Kópavogs sem gróðursetti og vann við uppgræðslu og áburðargjöf. Skógræktarskilyrði eru æði misjöfn eftir því hvar borið er niður í Selfjalli og umhverfi þess. Helstu vandkvæði varðandi ræktun eru gífurlega stór gróður- og jarðvegssnauð svæði og erfiðar norðaustan- og suðaustan áttir.
Með tilkomu þessa nýja skógræktarsvæðis er verið að spinna nýjan þráð í svonefndan Græna trefil sem eru skógræktar- og útivistarsvæði er umlykja höfuðborgarsvæðið.
Selfjall í Lækjarbotnum er auðþekkt þegar Suðurlandsvegur er ekinn í austur og komið er á móts við bæinn Gunnarshólma. Þá blasir Selfjallið við vegfarendum í suðri og er áberandi á hægri hönd þegar ekið er áfram upp fyrir Lögbergsbrekku. Fjallið, sem er hæst um 270 m, er myndað úr gömlu móbergi og hefur orðið til við gos undir jökli, að öllum líkindum eftir miðbik ísaldar. Suður af hæsta punkti Selfjallsins er Sandfell og síðan taka við víðáttumikil hraun. Í heild myndar svæðið fjölbreytt og áhugavert landslag. Útsýni af Selfjalli er mikið í allar áttir og auðvelt flestum að ganga upp á það.
